Дархан сумын ИТХ-ын дарга Т.Тулгаа “Монголын сайхан бичигтэн сурагч”-ийг хүлээн авч уулзаж, хүндэтгэл үзүүлэв. Хүмүүн бичиг сониноос жил бүр уламжлал болгон зохион байгуулдаг” Монголын сайхан бичигтэн “ тодруулах улсын уралдаанд Дархан хотын Оюуны ирээдүй цогцолбор сургуулийн 9-2 дугаар ангийн сурагч Болдбаатарын Урандөл сурагчдын ангилалд дэд байрьт шалгарсан байна. 18 дахь удаагийн улсын уралдаанд ЕБС-ийн сурагчдын ангилалд 700 гаруй сурагч оролцсон аж. Б.Урандөл охин Монгол бичгээр 2 жил гаруйн хугацаанд хичээллэсэн гэв. Анхны улсын уралдаанд оролцож хоёрдугаар байранд шалгарсан нь түүнд маш их урам зориг өгсөн гэдгийг онцлон хэлэв. Дархан сумын ИТХ-ын дарга Т. Тулгаа Монгол бичгийг түгээн дэлгэрүүлэх үйлсэд элэгтэй бөгөөд сумын хэмжээнд бодлогын түвшинд тодорхой ажлыг хэрэгжүүлж “ Үндэсний бичиг үсгээ эрхэмлэн дээдлэх уриалга”-ыг гаргаж 80 орчим хувь нь байгууллагын гадна талын хаягийг Монгол бичгээр сольсныг дурьдав. Монгол бичгийг хэрэглэх асуудал хөндөгдөж УИХ-ын түвшинд яригдаж эхэлсэн гээд Монголчууд бид эх хэл, түүх соёлоо түгээн дэлгэрүүлэх цаг болсныг өгүүлэв. Монголын сайхан бичигтэн улсын уралдаанд хоёрдугаар байрьт шалгарсан Б. Урандөл охинд Дархан сумын ИТХ-ын дарга өөрийн нэрийн өмнөөс болон Засаг даргын өмнөөс талархал илэрхийлж гарын бэлэг гардуулан өгөв.
